مرور الوقت يشبه للثواني يا لطيف الحال=وأنا رغم التمادي بالدقايق أشعر الساعة: .. كئيبة وأثقلت كاهل خفوقي والزمن دجّال=يسولفّني لغيه والجَلد في مهجتي طاعة .. نهرّني لين ماصار المدى حلّي وأنا الترحال=وسهرته لين علّقني بصدر الحلم شمّاعة .. ضناني بالطعون اللي سناها من شهيب اللال=و طعنّي بالطموح اللي زرعه القلب بأصباعه .. أضييييق بعتمة الليل الضرير وكذبة الآمال=واعود بدمعة الشيخ التقي وهاجس أتباعه!! .. وأسجّ بحسرة اللي مابقى له بالأمل مدخال=وأفوق بعزة اللي كل هذا الكون مرباعه!! .. متاهة .. معمعة.. حيرة.. أصيلة دمعة الرجال=الىَ سالت من إحساس الذنوب وزفرة أوجاعه!! .. هنا قبّلت يدين السهر والليل والموال=ومشيت أجمل ميادين القصيد بروح طمّاعة .. نهض بعد إنطوائي شعري اللي بالحشا يجتال=تسامى باليقين اللي نمت في مهجتي قاعه .. تهادى بالورق وأسقيت حرفه من شذى الفنجال=تقهوته العيون اللي بشعر الوجد سمّاعة .. ألوّح في خفوقي ياعيوني والرفاق أبطال=يبيعون المكارم في زمانٍ شانت أطباعه .. على ضوء السجية كانت إيديهم هلا ودلال=نواياهم مطايا من بياض وريح ذعذاعة .. هنا كان الحديث أطــول مسافة وإغتراب الفال :=نسيته من كثر ماأهدي مرور الوقت والساعة

أدوات القصيدة

النسبة 2.91/5 (11اجمالي)

• 1
• 2
• 3
• 4
• 5